“Jam i zhgënjyer”, Trump sulmon përsëri Zelenskyn, duke e akuzuar se nuk e ka lexuar propozimin e paqes

Presidenti i SHBA-së, Donald Trump, kritikoi të dielën në mbrëmje homologun e tij ukrainas, Volodymyr Zelensky, se nuk e kishte “lexuar propozimin” për paqe në Ukrainë, të zbuluar tre javë më parë nga Uashingtoni, i cili është objekt bisedimesh të ndara me Moskën dhe Kievin.

“Pra, ne folëm me Presidentin Putin, folëm me udhëheqësit ukrainas , përfshirë Zelenskyn, Presidentin Zelensky, dhe duhet të them se jam pak i zhgënjyer që Presidenti Zelensky nuk e ka lexuar ende propozimin amerikan për një zgjidhje në Ukrainë”, u ankua Donald Trump, kur u pyet nga gazetarët në një event gala në Uashington.

“Kjo i përshtatet Rusisë, e dini, mendoj se Rusia do të preferonte të kishte të gjithë vendin”, por “nuk jam i sigurt se kjo i përshtatet Zelensky-t”, shtoi Donald Trump.

Ky propozim dyshohet, si në Ukrainë ashtu edhe në Evropë, se i pasqyron shumë fort kërkesat e Rusisë. Propozimi fillestar, plani me 28 pika, ishte madje një kopjim-ngjitje, i përkthyer nga rusishtja në anglisht, i dëshirave të Kremlinit. Që atëherë, Ukraina dhe Evropa janë përpjekur të ribalancojnë propozimet.

Në fakt, që nga prezantimi i planit amerikan gati tre javë më parë, janë zhvilluar disa raunde bisedimesh me ukrainasit në Gjenevë dhe Florida për të provuar të ndryshojnë tekstin në favor të Kievit. Dokumenti iu prezantua gjithashtu të mërkurën Presidentit rus Vladimir Putin gjatë një vizite në Moskë nga i dërguari i SHBA-së Steve Witkoff dhe dhëndri i udhëheqësit amerikan, Jared Kushner. Pak detaje kanë dalë në dritë rreth këtij plani të ndryshuar, ndërsa një version fillestar u perceptua nga Kievi dhe aleatët e tij evropianë si kryesisht në favor të Rusisë.

Mosbesimi ndaj evropianëve dhe Kievit Pas takimit në Moskë, Kremlini pohoi se ishte bërë përparim, por se ende kishte “shumë punë” për t’u bërë për të arritur një zgjidhje të konfliktit të nisur në vitin 2022.

Friedrich Merz , Emmanuel Macron dhe udhëheqës të tjerë evropianë kanë shprehur mosbesimin e tyre ndaj përpjekjeve të SHBA-së për të negociuar përfundimin e luftës në Ukrainë me Rusinë , sipas shënimeve nga një telefonatë e parë nga e përjavshmja Der Spiegel .

Sipas citateve në anglisht, thuhet se presidenti francez Emmanuel Macron tha gjatë një bisede telefonike me homologët e tij evropianë dhe Volodymyr Zelensky se “ekziston rreziku që Shtetet e Bashkuara ta tradhtojnë Ukrainën për çështjen e territoreve pa pasur ndonjë garanci të qartë sigurie”.

Kancelari gjerman Friedrich Merz, i cituar gjithashtu në artikullin e Spiegel, i tha Volodymyr Zelensky- t të “jetë shumë i kujdesshëm në ditët në vijim”. Ai thuhet se tha se amerikanët “po luajnë lojëra me ju dhe me ne”. Sipas gazetës, presidenti finlandez Alexander Stubb shprehu mosbesim të ngjashëm. “Nuk mund ta lëmë Ukrainën dhe Volodymyr-in vetëm me këta djem”, thuhet se tha ai, duke iu referuar Steve Witkoff, të dërguarit special të presidentit amerikan, dhe Jared Kushner, dhëndrit të presidentit, të cilët u dërguan në Kremlin për të zhvilluar negociata në fillim të javës.